Presentazzione d''o prugietto d''a nova guida 'e vine 'e ll'Italia
'O 29 'e jennaro 2010 è stato presentato 'o prugietto d''a nova guida 'e vine 'e ll'Italia 'e ll'associazzione Slow Food 'int'â sala pe cunvegne d''a Banca d''a Campania, Collina Liguorini, Avellino. Ha nizziato 'a parlà Lucio Napodano, 'o direttore d''a Banca d''a Campania facenno nu saluto a tutte 'e perzone presiente e 'e varie relatore.
Seconno Gaetano Pascale 'o presidente 'e Slow Food Campania 'a fatica p''a guida è na fatica 'e prugietto, na fatica 'e na squadra 'e perzone. 'O prugietto vino nun s'ha ddà preouccpà solamente d''o prodotto vino, ma pure d''o produttore, 'e difficoltà ca nce stanno e pure d''a burocrazzia ca è na ccosa ca costa assaje p''e azziende piccerille.
Quinni passava 'a pparola â Giancarlo Gariglio ca s'occupa d''a sezzione edittorìa 'e Slow Food. Isso dicette ca dopo 'o sciogliemento d''a collaborazzione 'e Slow Food cu 'o Gambero Rosso ll'associazzione s'è ppresa 'n anno 'e tiempo ppe reflettere. A nnova guida vene fatto 'e tante perzone ovvero e grazzie ll'anno 'e reflessione mmo nce stanno tante idee diverze ca 12 mese primma. 'Int'â nnova guida nun ce stanno puntegge pecché a ggente guardava troppo 'e puntegge e nun leggeva 'a descrizzione. Nce stanno ppure altre ccose ca so rilevante p''a nova guida: 'e sisteme 'e curtevazzione e vineficazzione. Tutte ll'azziende ca se vonno nzerì 'int'â nnova guida s'hanno a ji a truvà e 'o mumento d''a viseta nun è solamente 'o mumento ppe gustà 'o vino, ma pure ppe canoscere bbene comme fatica ll'azzienda, comme vene curtevata e trattata 'a vite e comme vene quinni prudotto 'o vino. È quinni nu momento mpurtante 'e scambio nfra o produttore e ll'autòre. Ll'Italia vene presentata cu territorie ca nun so 'e reggione. 'A Campania nun è nu territorio ma nu nummero 'e territorie. Nun vonno nzerì giudizie, ma innecazzione e nun sarà 'a guida 'e vine solamente biologgeche 'o biodinameche, ma tutte 'e produzzione ca ausano mezze sostenibile ppe ll'ambiente ponno entrà. Vonno educà 'e produttore verzo ll'auso 'e tecniche sostenibele ppe ll'ambiente quinni. Nun se penza 'e ffà nu cuntrollo, ma 'e lavurà 'int'â na cunnezzione 'e se fidà ll'uno ll'ato.
Luciano Pignataro quinni 'nizzia spieganno ca nce sta na granne confusione nfra 'o lavoro 'e criteche, juornaliste, e comunicatore. 'A relazzionenfra ll'enologgia e 'e produttore nun è cchiù comme primma. 'O metodo 'e analizzà e cuntà 'a vitecultura e ll'agricoltura è cagnata assaje e cchesto ffa nascere ll'entusiasmo p''o prugietto 'e Slow Food. Na perzona sola ogge nun ppo arrevà a nisciuna pparte. Ogge s'ha ddà ppure vedè arreto 'o vino bbuono, comm'è fatto 'o vino e si nce sta ppure 'a bbona aggrecoltura. Nun s'ha ddà ffà na fatica ideologeca, ma ha ddà essere "etica". 'A Campania comme ppure 'a Calabbrea teneno nu potenzionale ovvero granne ca se po' sviluppà.
PPe finì parla 'o presidente 'e Slow Food Italia, Roberto Burdese e dice ca 'o prugietto nun è solo 'a guida, ma nce sta un granne prugietto vino. 'A guida 'e solamente nu strumiento, uno 'e tante. Ate so 'e "Master of food" e 'e corse 'e comme s'ha ddà degustà 'o vino. Isso mettesse 'e corse primma d''a guida pecché seconno isso nun ce sta raggione 'e ffà na guida ncopp'e vine quanno 'a ggente nun sape manche comme s'ha ddà capì 'o gusto. Ate stumente so' Vingnerons d'Europe e Terra Madre d''o vino. Mmo tutte 'e presidie p''o vino so sospese. E spera ca se ponno nizzià 'e 'e attivà chest'anno. A guida, dice, po' aiutà 'e scegliere nu vino, ma nun tene nnerizzà 'e accattà cierte vine. 'Int'ô bicchieriello nun c'ha ddà sta solamente 'o terretorio, ma ppure 'e perzone ca faticano ppe ffà 'o vino, 'e metode e tutte ll'ate ccose ca nce stanno attuorno. Nun è mportante ca tutto 'e biologgeco o biodinameco, nvece chello ca je mpurtante è ca nce sta trasparienza ncopp'e trattamiente fatte. Solo nu terretorio ca è sano è na ccosa bbona ca se po' ddà comme eredetà p''e generazzione ca veneno. Ll'uneco modo ppe arrivà 'o succiesso è cun n'alleanza 'e tutte cu pare dignetà.
E quinni mo s'ha ddà solamente aspettà ppe vedè comme sarà sta guida 'e vine 'e ll'Italia.
Ate ffoto d''a presentazione nce stanno ncopp'a cchesta paggena.
Sabine Emmy Eller
Articolo Precedente
